चैत्र चाहुल

सिध्द लेखिका समूह 

विषय - चैत्र  पालवी

 संपे पानगळ वृक्षांची 

 वृक्षांची पाने पाही वाट        

 चैत्र  पल्लवी अंगोपंगी 

अंगोपंगी दिसेल थाट    

संपली पानगळ आता

आता निसर्ग बहरेल

लेवूनिया कोवळी  पर्णे

 पर्णे  सृष्टीला खुलवेल

थंड वा-याची  ती झुळूक

  झुळूक   शहारेल अंग

फुले  फुलतील  मोहक     

  मोहक रंगी होऊ दंग

मोहरेल बहावा पळस

 पळस दिसे वनोवनी

 वसंताचे  नव  चैतन्य

  चैतन्य  पहा मनोमनी

चैत्र महिना चैतन्याचा

चैतन्याचा नव वर्षाचा

मनी उभारी देत असे

असे चैत्र  मास हर्षाचा

वैशाली वर्तक 

अहमदाबाद

अष्टाक्षरी देव नाही देवालयी *वसे चराचरात

काव्य सम्राट साहित्य  मंच

विषय - देव नाही देवालयी

अष्टाक्षरी 

    *वसे चराचरात

सदा करावे सत्कर्म

देव वसतो कर्मात

तेथे असतो देवच

देव नसे देव्हा-यात

नको पूजा जप ताप ,

देव वसे आपल्यात 

 नका शोधू देव्हा-यात

वसे तो चरा चरात    

देता गरीबास अन्न ,

 दोन आपुले कवळ   

तृप्त होऊनी हसला 

 आला असता जवळ

ओळखला नाही तया

 तोची जेवला सुखात

नका शोधू देव्हा-यात 

 वसे तो चरा चरात        

कळी पहा उमलली

   सुगंधाने गंधाळली

वा- यासंगे डौलताना 

उषा हसत लाजली   

सारी देवाची  करणी  

घडवितो दिनरात

देव वसे तो फुलात

शोधा तया निसर्गात 

वैशाली वर्तक

अहमदाबाद

गर्व

                         ५ ऑक्टोबर २४
सावली प्रकाशन समूह

विषय - गर्व

स्वभावाचे असती पैलू

क्रोधी , लोभी , निरागस

कोणी अभिमानी वा गर्वीष्ठ

तर कोणी निष्पाप लोभस

स्व अभिमान हा हवाच

तया वदती स्वाभिमानी

घेता गर्वाने जागा मनात

होतो स्वभाव अभिमानी

गर्व नेतो जीवन लयास 

जैसे गेले  बलाढ्य रावणाचे

प्रकांड पंडित शिवभक्त जरी

गर्वहरण झाले त्याच्या पराक्रमाचे

गर्व करु नये   कदापि पैशाचा

रहात नाही समाजात मान

लक्ष्मी च ती असते चंचल

ठेवावे सदा तियेचे भान

गर्व असावा मायबोलीचा

 पुरविते ज्ञानाची तहान

तोच गर्व असावा मायभूमीचा

जिच्या कुशीत होतो महान

वैशाली वर्तक 

अहमदाबाद 

5/4/2021

लोभ, मोह मद दूर सारा

दिली संतानी शिकवण

गर्वाने, मदाने न फुलता

जगावे ह्याची ठेवावी आठवण.

बालपणात ऐकलेल्या गोष्टीचे 

ध्यानी ठेवावे जीवनी  सार

न करिता गर्व जीवनात

ह्या ज्ञानाचा घ्यावा आधार

दुर्योधनाच्या मनीचा अती  गर्व

ठरला त्याच्या विनाशास कारण

असूनी शूर महा योध्दा ज्याने

अंगीकारले नाही सुनीतीचे धोरण

गर्व  कशाचाच नसावा मनी

सदा राखावा माणुसकीचा धर्म

आज असे उद्या  नसे रुप पैसा

हेच जाणून घ्यावे जीवनाचे मर्म

गजरा

गजरा

फुले धाग्यात ओवता

होतो  सुगंधी सुंदर

मन मोहक गजरा

दिसे पहा मनोहर

जातो सहजच हात

माळण्यास कुंतलात

फुले देतात आनंद

भर भरुन जीवनात

असे गजरा मोहक

वाढवीतो सौंदर्याला

आकर्षक दिसे रूप

उपयोगी  शृंगाराला

नारी नेमाने माळीती

येता जाता प्रसंगात

मानी सौभाग्याचे वाण

देण्या हळदी कुंकुवात

मोग-याचा सुगंधित

हवा सदैव गजरा

मन राहते प्रसन्न 

पहा वळती नजरा

एक गजरा देवा-ही

सुगंधित आसमंत

वाटे बसावे पहात

रूप देवाचे मूर्तीमंत

वैशाली वर्तक

अष्टाक्षरी प्रेमरंगी रंगताना (रंग प्रेमाचे)

सायबर क्राईम

                                             
उपक्रम 135

शब्दसेतू साहित्य  मंच

विषय -- प्रेमरंगी रंगताना

अष्टाक्षरी रचना

शीर्षक-- *रंग प्रेमाचे*

प्रेम उत्कट भावना

कसे करु गुणगान

सुखदायी असे भाव

मिळे मना समाधान

आई लेकराचे प्रेम

भावा बहिणीची माया

वडिलांची सर्वांवर

कर्तृत्वाची प्रेम छाया

मित्रत्वाचे  प्रेम रंग

जैसा कृष्ण सुदाम्याचे

सख्या सोबतीचे प्रेम

आपुलकी विश्वासाचे

देश भक्तांनी अर्पिले

प्राण पणाला लावूनी

देश प्रेम भाव होता

मनी भरला ठासूनी

निसर्गाचे धरेवर 

प्रेम वसे सदाकाळ

दावी तो बहु रंगात

घडे आशेची सकाळ

प्रेम दिसे देवाचेही

त्याच्या भक्तांवर असे 

गाथा तारुनिया दिल्या

भक्तीरंगी प्रेम दिसे

वैशाली वर्तक

अहमदाबाद 

३/४/२०२१

आता बस झाले

अ भा म सा प स्वप्नगंध समूह आयोजित  षडाक्षरी काव्य लेखन

स्पर्धा  

क्रमांक 6

विषय -- *आता बस झाले*

*नको गुणगान*

नको  एक दिन  

कौतुकाचे गान

रोज लिहा बोला

वाढवण्या शान

माय-बोलीनेच

जपली संस्कृती 

ठेवा  तिची जाण

वाढवुया किर्ती

तिच्या अस्तित्वाची

ठेवा भ्रांत मनी

 *आता बस झाले*

विचारु या क्षणी

 ती समृद्धतेत

आहेचिया खाण

साहित्यात  नसे 

कुठलीच वाण

तिच्या बळावर

मिळविता मान

जगतात करु

तिचाच सन्मान

सुवर्णाचा दिन

रोजची  आणुया

*बस झाले आता*

शिखरी नेऊया

वैशाली वर्तक 

अहमदाबाद

चित्र काव्य मानवाचा लोभ

सप्ताहिक रविवारीय  साहित्य 

लेखन स्पर्धा क्रमांक 38

साहित्य  प्रकार -- चित्र  काव्य    

      *मानवाचा लोभ*

मानवाचा लोभ

झळा ऊन्हाच्या साहूनी

धरा दिसते भकास 

दिसे   कोठेच न हिरवे

मन होतसे उदास 

 -हास करतो वनांचा

झाडे तोडून   कापून

प्राणी मात्र कोठे जाणार

पक्षी गण गेले त्रासून

नाही राहिला निवारा

वृक्षांची ती छत्र छाया

कुठे मिळणार तयांना

सावलीची प्रेमळ माया

पर्ण घेऊनी चोचीत

कष्टी पक्षीण दीनवाणी

देते सावली पिलांना 

वाहे डोळ्यातून पाणी.

स्वतःच आरंभिलास घात

तोडून सृष्टीचा प्रेम पाश

 उपयोग  काय आता

केला सृष्टी चा सर्व नाश

प्रगतीच्या गोड नावे

मानवाचा अती लोभ

ओढाविला निसर्ग  कोप

थांबव  मानवा हा क्षोभ

वैशाली वर्तक 

अहमदाबाद 

28/3/21