पश्चिम महाराष्ट्र काव्य करंडक काव्य लेखन स्पर्धा २०२५
स्पर्धा फेरी क्रमांक २
शब्दसेतू साहित्य मंच पुणे आणि मोरणा कवी कट्टा समूह, पश्चिम महाराष्ट्र
यांच्या विद्यमाने आयोजित राज्यव्यापी काव्यलेखन महा स्पर्धा
दि १\६\२०२५
विषय मायबाप
काव्यप्रकार अष्टाक्षरी
*जीवनाचे शिल्पकार*
देवा सम मायबाप
जीवनाचे शिल्पकार
घेती अतोनात कष्ट
देण्या जीवना आकार
मायबाप दोघे गुरू
दोघांचेही योगदान
त्यांचे कर्तृत्व महान
द्यावा नित्य नेमे मान.
ऋण आईवडिलांचे
फिटणार कधी नाही
कसे घडवू पाल्यांना
हीच चिंता मनी राही.
मनी तयांच्या एकच
असे उत्कर्षाचा ध्यास
पाल्य व्हावेत शिकून
कली-युगातील व्यास.
घाम गाळूनी श्रमाने
कष्ट साही अहोरात्र
मुखावरी न दाखवी
मायबाप एकमात्र.
दु:ख झेली घरासाठी
राहो कुटुंब सुखात
हाच मंत्र ध्यानी मनी
विठु गजर मुखात.
कलाकार संबोधती
प्रेक्षकांना मायबाप
कला गुण प्रसंशिता
देती कौतुकाची थाप
तुकोबांचे विठुराया
वसे सदैव अंतरी
तेची माझे मायबाप
अन् माहेर पंढरी
वैशाली वर्तक
अहमदाबाद
