कल्याण डोंबिवली महानगर 2
आयोजित उपक्रम
विषय.हसलेमनी चांदणे
मना जोगते होता काम
आनंदले माझे मन
चकाकत्या उन्हात पण
भासे फुलले नंदनवन
भाव मम अंतरीचे
तयाने सदैव जाणिले
सहज देत हात हाती
सप्त रंगी रंगविले
सहवास त्याचा माझा
प्रीत गंध पसरला
एकमेका देत साथ
संसार ही फुलवला
देवाने. सारे दिले
महत्वाचे दिले समाधान
भरुन पावले जीवनी
तेच ठरले सर्वोत्तम दान
झाले मनाने संतृप्त
काही न उरे मागणे
हसले मनी चांदणे
हेची देवास सांगणे
वैशाली वर्तक
अहमदाबाद
वर्ल्ड व्हिजन टाईम्स २९\७\२५*नाचत आला श्रावण
सुरु झाला ऋतु वर्षा
नभ दाटले मेघांनी
दाहकता कमी भासे
आदित्याची नभांगणी
गर्दी जलदांची नभी
गर्जताती कृष्ण मेघ
झाली घाई बरसण्या
मधे चमके वीज रेघ
ढोल ताशांच्या गर्जना
धुवादार बरसात
भासे फाटले आभाळ
वारा वाहतो जोशात
घन आले ओथंबूनी
लपंडाव चाले खेळ
मेघ गातात मल्हार
जमे पावसाचा मेळ
कड्यातून वाहे झरे
जणू शुभ्र दुग्ध धारा
खाच खळगे भरले
शीळ घाली मंद वारा
जणु सरी मोतीयांच्या
भासताती जल धारा
वाहे ओहोळ सर्वत्र
ओली चिंब झाली धरा
वैशाली वर्तक
मनभावन श्रावण काव्य शृंखला
कल्पतरू जागतिक साहित्य मंच आयोजित
काव्य शृंखलेत स्मिता भिमनवार व अंजली देशपांडे (नाशिक) यांना आमंत्रित केले आहे
माझी रचना👇🏼
विषय... मनभावन श्रावण
*सणवार आनंदाचा श्रावण*मनभावन \
मास आषाढ सरला
सुरु झाल्या श्रावण धारा
रिमझिम पडे पाऊस
थंड झोबतो अंगा वारा
ऊन आले म्हणताच
सरी वर सरी बरसती
लपंडाव ऊन पावसाचा
पक्षी मजेत विहरती
वाहती खळखळ नद्या
उंच कड्यावरुनी प्रपात
किती मोहक सृष्टी सजली
गाणे गाई वारा जोरात
येता श्रावण महिना
येई उधाण उत्साहाला
असे सणांचा सोहळा
सीमा न उरे आनंदाला
होते श्रावणाची सुरुवात
दिव्याच्या आवसेने
दीप पूजन करती नारी
भाव कृतार्थ जागवणे
याच महिन्यात येतो
कृष्ण जन्म,बैलपोळा
अन् रक्षा बंधन दिनाला
आप्त जन होती गोळा
अशी सणांची रेलचेल
असे आवडीचा श्रावण
होती आप्त जनांच्या भेटी
मास असे *मन भावन*
वैशाली वर्तक
अहमदाबाद
