विषय - वाटे पहावे दर्पण....
वाटे पहावे दर्पण निरखून घ्यावे रुप
येता जाता चाळा लागे बघण्याचे ते स्वरुप
विचारते दर्पणाला सांग कशी मी दिसते
उगा पदर ढळता मान वेळावून बघते
माझे न मी रहाते ,मोदभरे मनी खूप
वाटे पहावे दर्पण निरखून घ्यावे रुप 1
चोळी झाली घट्ट सर आले लावण्य भरास
गाली फुलले गुलाब छंद जडे नटण्यास
घेई चाहुल मन ते उगा वाटे हुरुप
वाटे पहावे दर्पण निरखून घ्यावे रुप 2
ओढ लागे सांजवेळी कुणीतरी यावे वाटे
पारिजात गंधाळता फूलासंगे हर्ष दाटे
यावा अवचित पाहुणा मजसी अनुरुप
वाटे पहावे दर्पण निरखून घ्यावे रुप 3
बट लाडिक भाळीची उगा बोटाने सावरे
वारा खट्याळ तिजला पुन्हा पुन्हा न आवरे
मनी भावला खेळ हा झाले तया एकरुप
वाटे पहावे दर्पण निरखून घ्यावे रुप 4
कोणत्याही टिप्पण्या नाहीत:
टिप्पणी पोस्ट करा