निसर्ग किमया
दशाक्षरी रचना
शब्दसेतू रविवारीय उपक्रम
निसर्गाची किती पहा कृपा
तोची आहे जगी एकमात्र
गर्मी थंडी वर्षा घडवितो
त्याची सत्ता दिसे दिन रात्र
येता रवी हसली वसुधा
नभी उधळण केशराची
ऐका किलबील ती पक्षांची
थंड मंद झुळुक वा-याची
येता वर्षा रूक्ष वसुंधरा
पहा कशी नटली सजली
रंग तियेचा एक हिरवा
तृणांकुरे पहा अंकुरली
सुनील नितळ जलाशय
तितकेच नभ मनोहर
मंद पवने वृक्षे डौलती
उंच उभी शिखरे सुंदर
ओहळ वाहती खळखळ
भासे जणु शुभ्र दुग्ध धारा
लोभस सृष्टीच्या नजाराचे
गाणे गातोय खट्याळ वारा
निसर्गाचे किती गुणगान
तयानेच घडविली सृष्टी
माना त्याला ईश्वर समान
हवी त्याचीच कृपेची दृष्टी
राहो निसर्गाचा समतोल
नाहीतर न दिसे सुकाळ
कधी न व्हावा असमतोल
अती वृष्टीने ओला दुष्काळ
प्रलय भुकंप ही कोपाची
नको कधी तो कोप ईश्वरा
अशी कारणे सृष्टी नाशाची
सदा ठेव सुखी विश्वंभरा
वैशाली वर्तक
============================&=&=
ऋतू चक्र
निसर्गाची पहा कृपा
तोची आसे एकमात्र
कधी गर्मी कधी वर्षा
त्याची सत्ता दिन रात्र
येता वर्षा रूक्ष धरा
पहा कशी बहरली
ओली चिंब होता माती
तृणांकुरे अंकुरली
वृक्ष लता वेली सा-या
दिसे हिरवे सर्वत्र
शालू हिरवा धरेचा
रंग तिचा एकमात्र
रुप भूमंडळाचे ते
बदलले पहा कसे
दिन सुगीचे ते येता
रुप नवे शोभतसे
होता पाने ती पिवळी
जागा करी हिरव्यास
नियमच तो सृष्टी चा
होत नाहीत उदास
शरदाची पानगळ
निस्तेजता वृक्षावरी
पाचोळ्याच्या पसा-याने
पीत रंग भूमीवरी
मोहरेल तो बहावा
फुटे नव पाने वनी
नव चैतन्याची सृष्टी
फुले वसंत तो मनी
ऋतू मागूनी ऋतू ते
बदलत जाती असे
निसर्गाची ही किमया
भूमंडळी शोभतसे
वैशाली वर्तक
अहमदाबाद
कोणत्याही टिप्पण्या नाहीत:
टिप्पणी पोस्ट करा