आई विषयक.. तव महिमा आई माझा शिक्षक बाल कविता फक्त माझीच आईतुझ्या कुशीत

आई (लिनाक्षरी)                     7/12/2018
दोन्ही वर्णे आ व ई असती गुरू
प्रत्येकाची "आई" हीच आद्य गुरू

धरूनीया बोट पहिले पाऊल
सुखी जीवनाची उमजे चाहूल

मिळे स्वर्ग सुख तिच्याच कुशीत
बालपण जाई सर्वांचे खुशीत

जरी असता स्वामी , तिन्ही जगाचा
आई विना असे, तो कष्टी मनाचा

घटाकार देई , घटांना आकार
देई संस्कार बाळांना , ती अपार

होता जीवा कधी दुखापत कदा
येतो शब्द "आई " ओठावरी सदा

आई किती वर्णू , तव गुण गाथा
नमविते तुझ्या , थोरवीला माथा.

            ...........वैशाली वर्तक



उपक्रम- अष्टाक्षरी
विषय ...आई

शीर्षक- **तव महिमा**

उच्चारता शब्द आई
फुटे मायेचा पाझर
भरलेला सदा साठी
प्रेम दयेचा सागर

धरुनीया तीचे बोट
टाकी पहिले पाऊल
सुखी जीवनाची सदा
लागे जीवास चाहुल

होता जीव कष्टी कदा
आई शब्द येई मुखी
स्वामी तिन्हीही जगाचा
आई नसता तो दुखी

जसे घडविण्या घडा
देती मातीला आकार
करी संस्कारी बाळांना
घेउनीया कष्ट फार

किती वर्णू तव गुण
तव मायेची ती गाथा
तुझी थोरवी महान
नमवितो माझा माथा

वैशाली वर्तक

सावली प्रकाशन  समूह 

स्पर्धेसाठी 

अष्टाक्षरी काव्य लेखन

विषय -- माझ्या  आईची महती

उपक्रम- अष्टाक्षरी

**तव महिमा**

उच्चारता शब्द आई           

फुटे मायेचा पाझर

भरलेला  माझ्यासाठी

प्रेम दयेचा सागर

केले उत्तम संस्कार 

जगी टाकण्या पाऊल   

व्हावी  सुखी  पायवाट

याची घेतली  चाहुल

 होई जीव  कष्टी कदा

 येतो शब्द  आई मुखी

  जरी असता संपन्न 

  आई विण मन  दुःखी

जसे घडविण्या घडा

देती मातीला आकार

घडविले तिने मला

घेउनीया कष्ट फार       

  

 आई कशी किती वर्णू ,     

 तव गुणांच्या मी गाथा          

 नमविते प्रेमभावे         

 तुझ्या  थोरवीला माथा

वाटे वर्णावी   सदाची

माझ्या  आईची महती

  कमी पडे माझी मती

 तूची  महान जगती    

.......,..वैशाली वर्तक

अहमदाबाद 7/1/2021

"विषय -- आई माझा शिक्षक *

आई आद्य गुरु* 

 जीवनात जन्मता आई 

प्रत्येकाचा पहिला गुरु 

बोट धरुनी जग दावीते 

गुरु पदाची सुरुवात सुरु 

 धरुनी तिने माझे बोट 

 शिकविले टाकण्या पाऊल

 तिच्या शिकवणीने मला 

मिळाली जीवनी यशाची चाहुल 

 जरी पडता, येता निराशा

 दिली भरारी करण्या कर्तृत्व 

 जीवनी माझ्या महत्त्वाचे 

  आहे  तिच्या योगदानाचे प्रभुत्व 

 दिले आईने धडे संस्काराचे

 महत्त्वाची तिची ठेव 

लावली जीवनी शिस्तता 

मला सदा भासते ती देव

 होता चुका मायबाप 

घेतात पदरात पाडसाला 

कधी रागावून समजावून 

घडवीले आपुल्या बालकाला 

 कितीही मोठे झालो तरी 

आईला वाटे लहान 

अनुभवाचे बोल आईचे 

जीवनी असती महान 

 वैशाली वर्तक अहमदाबाद "

अ भा ठाणे जिल्हा समूह १

 आयोजित 

उपक्रम

बालगीत

     *आई माझी च फक्त*

माझी आई  फक्त माझी 

आवडे मजला ती भारी

एकच आहे जगी अशी

आई माझी  मला प्यारी

येता जाता करते लाड

घेते मजला कुशीत

कुरवाळून प्रेमे उठविते 

तेव्हाच मी येते खुशीत

फिरायला नेते  बागेत मज

घेते नवीन  नवीन खेळणी  

करता हट्ट   रागावते मला

तरी  मज   भासे तीच देखणी

सांगते गोष्टी झोपताना

गाते गोड गोड गाणी

नीजताना हवी तीच

ऐकत रहावी तिची वाणी

वैशाली वर्तक 

अहमदाबाद

आई म्हणते  (  बाल काव्य)

वर्ण 14 यति 7

आई म्हणते तूची, भासे  नभीचा तारा    

तुज वीण भासतो, मज बाकी  पसारा

     म्हणे  मजला सदा ,माझा गोड गोडुला

      सदा मज साठी तो, असे माझा सानुला  

     भरलास तूची या , जीवनी मोद  सारा  

      आई म्हणते  तूची , भासे नभीचा तारा           1

  

घेउनी जाते सदा ,  मैदानात खेळाया

देते मस्त मस्त ची, खाऊ सदा  खावया     

सोनुला माझा आहे , मला सदाची प्यारा

आई म्हणते तूची ,भासे  नभीचा तारा                  2

    सहज पुरविते, ती लाड सोनुल्याचे

    सदाची तिला वेड ,माझे पापे घेण्याचे

     मज होता तो बाऊ , घालतेसे ती वारा

     आई म्हणते तूची, भासे  नभीचा तारा                3

वैशाली वर्तक

*आई तुझ्या कुशीत*

      

पाय टाकताच घरी

तुला भेटण्याची घाई 

आई मुख.दिसताच

मन आनंदून जाई

सारे मिळता जगती

मन  आनंदते खुशीत

सुख स्वर्गाचे लाभते

फक्त आईच्या कुशीत 

प्रातः काळी उठताच 

काय हवे नको पाही. 

घरातील प्रत्येकाला

असे  ते मिळण्याची ग्वाही

करून दुर्लक्षित स्वतःस

नेहमी विचार दुजांचा

परिपूर्णता करण्यात 

कुटुंबीय  हर जनांचा.

आहेच मी भाग्यवान 

तीर्थक्षेत्रे तव चरणाशी 

असता तू मजपाशी 

वाटे नको जाणे काशी

प्रिय ती. आईस

   सानविवि

            खरच ग आई  . आज मध्य प्रदेश  मराठी अकादमी इंदौर व महाराष्ट्र साहित्य सभा इंदोर यांनी *पत्र  लेखन* विषय दिल्याने तुझ्या शी संवाद साधण्याची छानच  संधी मिळाली . खरच तुझ्या शी खूप  सारे बोलायचे सांगायचे आहे. किती काळ लोटला. खूप  सा-या घडामोडी घडल्या . कुठून सुरुवात करु .

मलाच समजत नाहीआहे. 

         मोठ्या नातवाच्या लग्नात तर तू  होतीस . किती ७ दिवस लग्न चालले होते.  अगदी वाजत गाजत पार पडले. आमच्या कडच्या सर्व  नातेवाईकांना फारच लग्न  सोहळा आवडला होता. पुढे   पणतु दर्शन पण तू केलेस .तुझ्या  पहिल्या लाडक्या नातवाच्या   मुलाचे (पणतुचे)मुख दर्शन होते.  

आणि कौतुकाचा भाग  की,  तेव्हा चार ही पणज्या तुम्ही  रांगेत बसल्या होत्या . चौघींचे औक्षण करुन मी बकूळ फूले तुमच्या शिरावर उधळली होती. काय अपूर्व  सोहळा होता ना !

   पण पुढे  दुस-या नातवाचे लग्न ठरले त्या सूनेला पण तू पाहिलेस ... तुला भेटायला आणली तू तिला अजून साखर पुडा पण  न होता. साडी देऊन आशीर्वाद पण दिलेस. पण,माझे दुर्भाग्य तुझी तब्बेत खालावत गेली. व त्याच्या पुण्यातील लग्नाला तू नव्हती.  फार वाईट वाटले. 

    मोठ्या नातवाच्या लग्ना  प्रमाणे त्याचे पण लग्न थाटात  पार पडले. पुढे मुलीचे ,शेंडेफळ तिचे  पण लग्न तिचे तीने शोधले,पण जावई छान आहे हं.तिचे लग्न पण थाटात पार पडले. तू फक्त पहिल्या नातवाचे लग्न व पणतु पाहिलास.

      अग तुला खास सांगायचे तू हाडाची शिक्षीका.. दोन्हीही  नातू  तुझ्या च कडे शिकायची. त्यात पहिल्या नातवावर  तुझा जास्त लळा... काय कौतुक सांगू त्याचे ! तू असतांनाच तो नोकरीस तर लागला होताच. BE तर होताच पुढे mtech झाला  आता काय सांगू phd पण केले .....नातू कोणाचा?

  .एवढेच नव्हे तर नाटकातून काम करतो. आपल्या महाराष्ट्र  समाजाचा नाट्य सेक्रेटरी आहे .बृहन महाराष्ट्रातून नाटकातून बरीच पारितोषिक  मिळवतो. स्वतः नाटक लिहून नाटक बसवतो.  गेल्या वर्षी तर

समाजाचा १०० वाट वाढदिवस होता.खूप हिरीरीने मेहेनत घेऊन शताब्दी महोत्सव साजरा केला. व एक गंमत सांगते. आधी तुझी नातंवड म्हणून लोक त्याला ओळखायची ,आता सारे शहर आम्हाला  त्याचे आईवडील म्हणून ओळखतात.. किती छान वाटत ना! असो, अजून एक यंदा अहिल्याबाई लोकमाता ह्यांचे ३०० वे वर्षं,तर  त्याने अहिल्यादेवींच्या जीवनावरचे  नाटक स्वतः निर्देशक करून त्याचा आता शो सुरतला पण करणार आहे.  कौतुक वाटतं ना !

      असो दुसरा नातु पण कमी नाही हं  ..तो पण परदेशात छान काॕम्पुटर eng असून मोठ्या कंपनीत  मोठ्या पगाराची नोकरीत  बस्तान मांडून आहे. तसेंच तो पण हार्मोनियमची साथ संगत करत असतो.मोठ्या कलाकारां बरोबर साथ करण्याची सुवर्ण संधी त्यास मिळत असते.

    आणि मुलीचे कौतुक  काय सांगु? ती पण आपल्याच शहरात  रहाते त्यामुळे  सतत भेटते. जशी मी तुला  एकाच गावात असल्याने  भेटायची  तशीच. तुझ्याच सारखे मी पण तिला माहेरचे झाड लावून दिले आहे.  विशेष म्हणजे नणदा भावजया अगदी दृष्ट लागेल अशा मैत्रीणी आहेत. रहायला पण जवळच आहे .ती पण मोठ्या कंपनीत सर्वीसला आहे. मुलीचे पण सुख उपभोगत आहे .ती म्हणजे तिसरा मुलगाच आहे.  अगदी  सतत काय हवे नको पहात असते.

     आणि हो तिन्हीही मुलांनी संगीत आवड छान जोपासली आहे एक तबला विषारद तर दुसरा हार्मोनियम निष्णात आहे. तू असताना  पण मुलगी विषारी  व दोन्ही मुले तबला व पेटी वादक त्यांचे  १०\१२   कार्यक्रम झालेच होतेच .

     आणि तुझी लेक पण कमी नाही हं. मुलगी कोणाची? पूर्वी  मी पोहण्यात  च्यपियन शीप ., शाळा काॕलेज मधे मिळविली होती.   पण विशेष म्हणजे मी ६५ नंतर पुन्हा  पोहण्यात वरिष्ठ  नागरिकात भाग घेउ लागले  आहे. व आता पण मी राज्य स्तरीय पारितोषिक  मिळवलीत. .ऐवढेच नव्हेतर  कॕनडाला fina   ला पण भाग घेण्यास जाउन आले .तेथे काही नंबर आला नाही पण utub वर नाव झळकले .  असो . तेथे नंबर नाही आला पण भाग घेऊन त्यांच्या ठराविक टाईमीग दिल्याने utube  वर नाव  झळकले. असो.

   हे सगळे प्रसंग जात असता मला तुझी बाबांची फार आठवण होई .. बाबांना तर माझे कौतुक फारच होते. बाबा तर गावभर माझे कौतुक  करत फिरले असते .. असो.

    .फार वर्षांच्या गप्पा केल्या .आणि खरतर मध्य प्रदेश  मराठी अकादमी चे  आभार मानते . हे सर्व  एका दमात मला   तुला सांगायला मिळाले.  आणि सर्वात यांचे श्रेय पण तितकेच महत्त्वाचे. त्यांची वेळोवेळी मला साथ.

  अजून एक गोष्ट पुढच्या पत्रात कळवीन.सध्या लेखणी माझी सखी झाली आहे.मी कवयित्री झाली आहे. पुढच्या पत्री त्यावर सविस्तर लिहीन.

 पत्र तुझ्या  फोटो फ्रेम मधे ठेवत आहे . वाकून नमस्कार 

तुझी लाडकी लेक 

बेबी विनोदिनी

 

३८७