तुझा स्पर्श

शब्द निशुका
 विषय - तुझा स्पर्श
स्पर्धे साठी

पहिलाच तो स्पर्श
असे मातेचा
जिव्हाळा देतो
जीवास  जो मायेचा

तव स्पर्श  देतो ग
मज उभारी
सदा जीवनी
घेण्या उंच भरारी

अजूनही स्मरतो
सख्याचा स्पर्श
केले बेधुंद
मनी जाहला हर्ष

स्पर्शण्या मृग धारा
भुमी   अतृप्त
मेघ वर्षता
होई वसुधा तृप्त

मनी ओढ लाटेला
भेट तीराशी
लाजूनी चूर
स्पर्शता किना-याशी

विठूच्या दर्शनाची
चोख्याची आस
चरण स्पर्श
करण्या मनी ध्यास

वैशाली वर्तक